Shekulli XXI thërret të ecim me Kohën.
Ec me Kohën
Shekulli XXI thërret të ecim me Kohën. Ai nuk di të flasë, por thërret përmes mendjeve të njerëzve. Këto mendje i posedojnë nga Krijuesi i tyre, Allahu, Krijuesi i çdo gjëje. Krijuesi edhe i Kohës, i Cili betohet për Kohën duke thënë: “Pasha kohën! Nuk ka dyshim se njeriu është në një humbje të sigurt. Me përjashtim të atyre që besuan, që bënë vepra të mira, që porositën njëri-tjetrin t’i përmbahen të vërtetës dhe që këshilluan njëri-tjetrin të jenë të durueshëm. (El-Asr, 1-3)
Pra, ne jemi udhëtarë që ecim nëpër kohë. Koha është ditari për secilin njeri. Ditar i cili secilit njeri do t’ia shkruajë një libër që nga lindja e deri në vdekje. E pranoi apo e refuzoi, njeriu nuk pyetet. Allahu i Gjithëdijshëm thotë: ”Kurse ndaj jush kanë përcjellësit (melekët e caktuar me përgjegjësi për njerëzit) Janë shkrues të ndershëm te All-llahu. Ata e dinë se çka punoni.” (El infitar, 10-12)
”Dhe se kur dy engjëjt qëndrojnë pranë tij në të djathtë dhe në të majtë. Që ai nuk hedh ndonjë fjalë e të mos jetë pranë tij përcjellësi i gatshëm (për të shënuar atë).” (Kaf, 17-18)
Dhe pas vdekjes secilit njeri ky libër i arrihet në qafë, dhe në Ditën e Gjykimit hapet para Allahut, për të cilën gjë Allahu na thotë:”Secilit njeri ia kemi ngjeshur në qafë fluturaken (shënimin - për veprimin) e tij, e në ditën e gjykimit, Ne do t’ia prezantojmë atij librin e hapur, “Lexo librin tënd, mjafton të jesh sot vetë llogaritës i vetvetes”.(El Isra, 13-14)
“Dhe vihet libri (i veprave), e i sheh mëkatarët të frikësuar nga shënimet që janë në të dhe thonë: “Të mjerët ne, ç’është puna e këtij libri që nuk ka lënë as (mëkat) të vogël e as të madh pa e përfshirë?”, dhe atë që vepruan e gjejnë të gatshme - prezent, e Zoti yt nuk i bën padrejtë askujt.” (El-Kehf, 49)
Allahu na porosit të jemi të kujdesshëm për jetën që e jetojmë duke na thënë: ”Ata të cilët vetë nuk besuan dhe penguan edhe të tjerët nga rruga e Allahut, Ai ua ka asgjësuar veprat e tyre. Ndërsa atyre që besuan, bënë vepra të mira dhe atë që iu shpall Muhamedit e besuan, e ajo është e vërtetë prej Zotit të tyre, Ai atyre ua shlyen mëkatet dhe ua përmirëson gjendjen. Kjo është kështu, ngase ata që nuk besuan ndoqën të pavërtetën, e ata që besuan ndoqën të vërtetën që u erdhi prej Zotit të tyre. Kështu All-llahu ua sjell njerëzve shembujt e tyre.” (Muhammed, 1-3)
Allahu na përkujton dhe na thotë: “Gjithçka që është mbi tokë, Ne e bëmë stoli të saj, për t’i provuar ata, se cili prej tyre do të jetë më vepërmirë.” (El-Kehf, 7)
Allahu na tërheq vërejtjen duke na thënë: “Unë do t’i zmbraps nga argumentet e Mia ata të cilët pa pasur të drejtë bëjnë kryelartësi në tokë, të cilët edhe nëse shohin çdo argument nuk besojnë, dhe nëse shohin rrugën e shpëtimit nuk e marrin atë rrugë, e nëse e shohin rrugën e gabuar ata e marrin atë rrugë. Këtë (këtë verbërim të tyre), ngase ata i konsideruan të rreme faktet Tona dhe ngase i lanë pas dore ato.” (El A’raf, 146) ”Ata që kundërshtojnë fenë e Allahut pasi që asaj i janë përgjigjur (njerëzit), faktet e tyre janë të asgjësuara te Zoti i tyre, ata janë të përbuzur dhe ata do të kenë dënim të rëndë.” (Esh-Shura, 16)
I Dërguari, lavdërimi dhe paqja e Allahut qofshin mbi të, na ka këshilluar, siç transmeton Ibni Umeri se i Dërguari, lavdërimi dhe shpëtimi i Allahut qofshin mbi të, e ka kapur atë për krahu dhe i ka thënë: “Jeto në këtë botë si të jesh i huaj apo udhëtar"
Si udhëtar të kohës po përjetojmë shkallëzime të shumta. Të arriturat shkencore dhe teknologjike njeriut ia imponojnë të ndihet superior dhe i pavarur nga Fuqia Absolute, Allahu i Madhërishëm. Duhet ditur se nga Fuqia mbinatyrore rrjedhin dhe vijnë të gjitha zbulimet shkencore dhe teknologjike përmes mendjeve të njerëzve. Mendje, të cilat duhet të besojnë, adhurojnë dhe falënderojnë Krijuesin e tyre në mënyrën e drejtë, ashtu siç na ka mësuar mësuesi ynë i dashur, Muhamedi, lavdërimi dhe paqja e Allahut qofshin mbi të, i cili thotë: ”Me të vërtetë, Allahu, melekët e Tij, banorët e qiejve dhe tokës, bile edhe thnegla në vrimën e saj dhe peshqit në thellësitë e deteve, kërkojnë mëshirë për ata që ua mësojnë njerëzve të mirën.” (Transmeton Tirmidhiu dhe hadithi është sahih)
|