Shkruar nga Husein Eserraxh
|
e mėrkurė. 28 janar 2009 |
Allahu është i Bukur dhe e do të bukurën…
Me emrin e Allahut, të Gjithëmëshirshmit, Mëshirëplotit Falënderimet dhe lavdërimet qofshin vetëm për Allahun e Lartësuar, i Cili ka krijuar qiejt dhe tokën dhe çfarë ka në mes tyre. Vetëm Atij i përulemi dhe vetëm prej Tij kërkojmë ndihmë e shpëtim. Paqja dhe shpëtimet qofshin mbi të dërguarin Muhamed dhe mbi familjen e tij të pastër, si dhe mbi të gjithë ata që ndjekin rrugën e tij deri në Ditën e Gjykimit. Në hadithin të cilin e transmeton Ibn Abasi (Allahu qoftë i kënaqur me të!) thotë se i Dërguari i Allahut (paqja dhe shpëtimi i Allahut qofshin mbi të!) ka thënë:
“Allahu është i Bukur dhe e do të bukurën…” Shënon Muslimi.
I Bukuri është ai që cilësohet me mirësi dhe bamirësi, ndaj Allahu i Lartësuar është: a) i Bukuri në Qenie, Emrat dhe Cilësitë e Tij. I dërguari i Allahut (paqja dhe shpëtimi i Allahut qofshin mbi të!) ka thënë: “Mbulesa e Tij është dritë, sikur të mos ishte kjo mbulesë do të digjej çdo gjë.”
b) i Bukuri në veprat e Tij. Veprat e Allahut të tëra janë të bukura. Ato janë në mes të së mbarës dhe mirësisë, mes vlerës dhe drejtësisë, të tëra janë në pajtim me urtësinë dhe lavdërimin e nuk ka në veprat e Tij diçka të kotë e të pavlefshme, por të gjitha janë mirësi, udhëzim, mëshirë, drejtësi. Allahu i Lartësuar thotë:
“Vërtet, Zoti im është i drejtë.” Hud, 56.
c) i Bukuri në krijim: “Ai që përsosi krijimin e çdo sendi” Sexhde, 7.
d) i Bukuri në gjykim: “Për një popull që bindshëm beson, a ka gjykim më i mirë se ai i Allahut?” Maide, 50. |